ಇವಳು

ಸಾವಿರ ಸುಳ್ಳು ಹೇಳಿದರೂ ಅವನು ಮಾತ್ರ ಸತ್ಯ

ನನ್ನವನ ತೋಳ ಬಂಧನದ ಶಕ್ತಿಗೆ ಬೆಟ್ಟ ಬೆಟ್ಟಗಳೇ ನುಚ್ಚುನೂರಾಗುತ್ತವೆ

ನನ್ನ ಕವಿತ್ವ ಮತ್ತದರ ಋಜುತ್ವವನ್ನು ಅವನ ನಿಟ್ಟುಸಿರು ನಿರ್ಧರಿಸುತ್ತದೆ

ಎಷ್ಟೇ ಬಾರಿ ಕೂಡಿ ಕಳೆದು ಭಾಗಿಸಿದರೂ ನನ್ನವನು ಸೊನ್ನೆಯಾಗುವುದಿಲ್ಲ

ನನ್ನವನು ಗೀಚುವ ಪ್ರತಿ ಚಿತ್ರದಲ್ಲೂ ನಾನು ಬೆತ್ತಲು ಅವನು ಬಟಾ ಬಯಲು

ನನ್ನವನು ಸಾವಿನಂತೆ; ಆವರಿಸಿಕೊಂಡರೆ ಉಸಿರಾಡುವುದನ್ನೂ ಮರೆತು ಬಿಡುತ್ತೇನೆ

ಸಿಡುಕು ಮುನಿಸು ಜಗಳದ ನಂತರ ನಾನವನ ಕೊರಳ ಹಾರವಾಗುತ್ತೇನೆ !

ಪ್ರತಿ ಬಾರಿ ಅವನು ನನ್ನ ಪಾದ ಚುಂಬಿಸಿದಾಗಲೂ ನೆತ್ತರು ಧಿಮ್ಮನೆ ಮೆದುಳಿಗೆ ನುಗ್ಗಿ ನಾನು ಹುಚ್ಚಿಯಾಗುತ್ತೇನೆ

ಬಾ… ಎಂದು ಚೀರಿದಾಗಲೆಲ್ಲ ಅವನು ನಾಪತ್ತೆ ನೊಂದು ಏಕಾಂತ ಬಯಸಿದಾಗ ಓಡಿ ಬಂದು ಮಡಿಲ ಮಗುವಾಗುತ್ತಾನೆ !

ನನ್ನ ತಳಮಳಗಳಿಗೆಲ್ಲ ತಾನು ಕಾರಣನೆಂಬ ಭಾವವೇ ಅವನ ಅಹಂಕಾರ ಹೆಚ್ಚಿಸುತ್ತದೆ